Bèr Born
Veuraan zaot ik op de iërste bank, det waas beej de Clim van Jennen. Hae zoot met de rök naor mich toe en raukte zwaore Van Nelle. De asbak stond op mien bank met de sigaret.
Toen ik ’n klein trekske noom, dreijde hae zich meij um en zoog det. “Neem der nog maar ein,” zag hae! Det waas unne toffe lièraar.
Ansems de lièraar Duits waas neet zonne kwante. Als weej beej um binnekwame de ièrste les van ’t jaor zag hae: “De breurs van Born achteraan in de klas, ik wil ôch dit jaor neet mièr zeen". Det sloog gewoën nerges op. Weej dachte det weej toch wael ôs bes deeje!
De Bonsel dae waas gemein op zien maneer! Weej hadde speulkwarteer en vas ’n sjekkie gedreijd (eigelik mochse neet rauke op schoèl) en det aangestaoke.
De Bonsel had oppasdeens en had det in de smieze, maar hae zag niks! Maar hae bleef net zoë lang achter mich laupe, wies ik ’n gaat in mien tes gebrand had! Det zal de straf wael gewaes zien!
De Kièp van Hendriks goof op Aswoonsdaag altièd ’n schriftelikke euverhuring, dan pakte hae Tante Bet en daor kôs hae zich de ganse les achter verstoppe, of slaope det weit ik neet!
Dink nog ens aan de dansaovond in de gymzaal. Daor waas ik aan ’t Rock end Rolle met Mariet Vallen. Deej de bein oètein en Mariet met zien tiën petticoots ging der onderdoor, ik kôs um neet halde en Mariet zeilde ’n paar maeter wiejer! Det waas neut zoë leuk, maar weej hebbe wael gelache!
Sef Peeters had ’n woord met dreej letters beej de teikenlieraar 'Corrie' achterop de jas geschreve.
Nao de les zag hae det taege um. De lieraar vroog nog aan de klas wae det gedaon had, maar nemes zei der waat!
Sef slaagde wael, maar had toch ’n veer veur teikene op zien cijferliès.
Det letste had ik van René gehuurd!
Unne kièr waas ’t fijn weer en weej beslaote met de ganse klas te spijbele en langs de Maas te gaon wandele! Det hebbe weej geweite, want weej môste unne maond lank alle vreeje ôre truukkomme! En det veur ein eurke!
Als se van unne lièraar de gank op môs, leet de Luier dich altièd beej um in de klas.
Det waas unne hiele leeve man. Allein van die 4711 oodekloenje heb ik trauma’s aan euver gehalde. Zoot ens in de bus met ’n schoèltripke en waas wagekrank en slech deraan, kwaam hae met zien fleske Kölswater en toen heb ik René geluif ik gans ondergespeejd, allein die luch al!
Op ièrste daag det ik naor schoèl kwaam, ging ik binne beej Tante Sidonia (Nederlands) en stelde mich veur en zei det ik ’n broor van René waas, zeej steurde mich bijna de klas oèt, euver discriminatrie gespraoke! Ondanks al die lol, zièn weej good terech gekomme!
-
Rijks:
1954-
